E' nata mmiez' 'o mare

di Alessandra Calabrese - Mmiez’’o mare nce steva ’nscuoglio,piccerillo piccerillo, e nce viveva ’na femmena bella, tanto bella che nun se po’

dicere. Chisto scuoglio era nato cu essa, e p’essa ce mureva: si surtanto pensava dint’’o suonno e se ne jì’ addò ’o mare nun ’a poteva vedè. Teneva ’n capa, ’sta femmena bella, e seta nera filata ’na scarola, ’na vucchella de cerasa, rossa ca chiammava vase. Nun se sape chi è mamma a ’sta nenna, ca nascette mmiez’’o mare ’na sera ca lu cielo era de brillante e cantaveno delfine e sirene. ’Nnzieme a essa nascette ’stu scuoglio ca s’’a pigliava ’n zino e a cunnuliava p’’a fa addurmì cu ’a Luna che ’a guardava. Crescette e se facette chiù assaje ancora bella e sapurita, che co li pisci de lu mare e cu ’e sirene pazziava, e cu e delfine c’arraggiunava de paesi luntane e de storie de ’nu munno addò uommene e femmene faticavano e durmeveno, e faceveno all’ammore, e isso ’n zino a essa s’’a pigliava e dint’’a ’na recchia ce murmuriava, e scavanne cu ’nu pere dint’’a rena essa rideva e ce deva ’nu vaso e s’appicciava rossa comm’’o sole quanno ’a sera se tuculea cu ’o mare. Senteva de creature piccerelle, rosa de carne e rosse lli guancelle, ca ’e mamme s’’e tenevano strette a lu core mentre ’o viento ll’aizava ’e vveste. E quanta ball’ e quanta feste, le cuntavano li delfine de guaje e passione, de furtune e de canzone, de chitarre e manduline. Quanta suonne teneva dint’’o core ’sta figliola, e ’o desiderio de ’ncuntrà ’n’omme, uno sulo, ca s’’a pigliava ’n zino pure a essa e s’’a stregneva ’m pietto ca lu respiro ’eva murì partorenno ammore; e tanto ll’ardore e tanto ’o desiderio ca ll’uocchie, comm’’a duje diamante, lucevano: fare dint’’o scure; e ’o caso vulette che ’na nave proprio ’n tramente se truvaje passanne. ’N copp’’a ’sta nave, ca veneva da l’oriente, uno sule scurgette dint’’o mare chistu scuoglio piccerillo e lo dicette. Già stracquate, che venevano de luntano, lli turchi se ’n ce jettero a repusare. Comme scennettero da li varche a uno a uno ’sta scarola li facette annammurare. Senza squasi né verrizzi, ca sulo accumparenno ’sta fata l’affatava, sulo guardannele ’sta pupata l’incantava. E chi pe’ la cimma e chi pe’ llo streppone, tutti lli turchi se la volevano magnare, accussì venette, che da lu primmo all’urdemo, senza distinzione arcuna, ’ntrapresero a sucutiarla fin quasi a la matina. E fujeva pe’ luongo e pe’ largo ’sta figliola ’ncoppa a lu scuoglio, ca p’essa nce mureva eppure...cchiù gruosso nun se poteva fà; aret’ a ogni ’ngogna appujato, ’nu turco suspirava vedennela ’e passà cu lo sciato doce doce ca se spezzava mmocca pe’ ll’affanno. “Viato a chi la vence cu ’sta figliola”, diceveno chill’uocchie ’mbressiunate. Sul’uno da luntano s’ammirava mentre teneva mente ’st’ammuina, chillo ca ’na vota ’eva ’ntiso de nu notaro, ca ’nnammurato se vasaje ll’Anema d’’o mare e ’a lassaje prena. A Luna, ca pe’ ’sta nenna ce teneva chiù assaje ancora ca si fosse stata figlia a essa, appaurata, lu Viento pregaje de ce piglià ’na stella.’Nu suspiro, allora, s’aisava ’n cielo ’nfurmatosi comm’a ’na mana e nce purtaje ’na stella diana, e ’m pietto c’’appujaie pe’ fa murì ll’amante a doje a doje. Ahi quanta turchi putettero cadè pe’ la passione! E mentre s’addenucchiaveno ’n terra tutte quante, sulo a isso ’sta stella nun ce facette niente, ca chiano chiano lle jette avvicino e s’’a pigliava ’n zino. E mentre lle strigneva chelli manelle de zucchero filato, mele e ammore se zucaje da chella vocca lu turco affurtunato.

Joomla templates by a4joomla